Iniulat ng Land Transportation Office (LTO) na mahigit 270,000 motor vehicles ang nag-renew ng kanilang expired registration noong nakaraang buwan.
Sa isang pahayag, binanggit ng LTO na 198,283 motorsiklo, 20,427 sasakyan, 34,436 utility vehicles, 12,123 sports utility vehicles, 5,617 taxi, 1,098 tricycle, at 168 bus ang nag-renew ng kanilang rehistrasyon mula Enero 1-31.
Sa kabuuan, ang pinakamataas na bilang ng mga renewal ng rehistro ng sasakyan ay naitala sa National Capital Region (NCR) o Metro Manila, na may 48,490.
Sumunod sa NCR ay ang Calabarzon na may 39,680; Central Visayas na may 30,021; at Central Luzon na may 25,456.
Ayon sa LTO, bumisita ang hepe nito na si Assistant Secretary Vigor Mendoza II sa mga regional office para isulong pa ang patakarang “No Registration, No Travel”.
Tinanong din ni Mendoza ang mga tanggapan tungkol sa katayuan ng kanilang mga hakbang sa kaligtasan sa kalsada.
Aniya, nais suriin ng LTO ang mga programa, proyekto at magagandang gawain ng bawat tanggapan na maaaring gayahin at magamit sa ibang bahagi ng bansa.
Giit ni Mendoza na layunin ng kanilang ahensya na makapagbigay ng maayos, mabilis, at mapagmalasakit na serbisyo sa mga mamamayan.
