Tinatayang P817.87 milyon ang umano’y unexplained wealth nina Vice President Sara Duterte at asawang si Atty. Manases “Mans” Carpio mula 2022 hanggang 2025, batay sa pagsusuri ng prosecution forensic expert na si Atty. Alexander Cabrera sa kanilang financial records.
Ayon kay Cabrera, kabilang sa kanyang pagsusuri ang mga hindi naideklarang cash, personal at real properties, kita ng mag-asawa, at mga business interest. Isinaalang-alang din niya ang kanilang ari-arian sa ilalim ng absolute community of property, dahil wala siyang nakitang prenup agreement o judicial decree of separation of property.
Iniulat ni Cabrera na may mga bank account ang mag-asawa na hindi naideklara sa Statement of Assets, Liabilities and Net Worth (SALN) ni Duterte.
Itinuro rin ng forensic expert ang umano’y kuwestiyonableng banking transactions sa isang araw at mga hindi naideklarang personal at real properties na nagkakahalaga ng milyones taun-taon simula 2022-2025.
Kabilang din sa computation ni Cabrera ang umano’y kita at assets mula sa mga business interest na CALE88, Metro City at Gencorp. Tinataya niya ang kabuuang hindi naideklarang kita at assets ng mag-asawa na umabot sa mahigit P800 milyon ang kabuuan.
