Inaprubahan ng Budget Amendments Review Subcommittee o BARSc ang panukalang dagdag na P673 milyon sa 2027 budget ng Presidential Communications Office o PCO at mga attached agencies nito.
Isinulong kasi ni Parañaque 2nd District Representative Brian Yamsuan ang dagdag na pondo para sa government stations.
Kabilang dito ang P600 milyon para sa government TV station, P35.985 milyon para sa isa pang government TV station at P12 milyon sa Philippine Information Agency (PIA) at P25 milyon para sa karagdagang Bangon Pilipinas studios sa buong bansa.
“Information is not just knowledge, it is a foundation of accountability, and an informed public is better equipped to ask questions, challenge and consistently demand responsible action if it is well informed,” pahayag ni Yamsuan.
Layunin ng mga dagdag na pondo na mapalakas ang government communications at mga public service broadcast network.
Suportado ng mga kasamahan ni Yamsuan ang kanyang panukalang dagdagan ang badyet ng PCO at mga ahensyang nasa ilalim nito.
Kabilang sa mga nagpahayag ng suporta si Bataan 2nd District Rep. Albert Garcia, senior vice chairperson ng House Committee on Appropriations.
Sa ilalim ng 2027 National Expenditure Program, nasa P2.62 bilyon ang kabuuang panukalang budget para sa PCO at mga attached agencies nito.
