Kinumpirma ng Philippine Consulate General sa Hong Kong ang pagkamatay ng isang overseas Filipino workers (OFW) sa sunog sa Tai Po district sa Hong Kong noong Nobyembre 26.
Hindi pinangalanan ang biktima ngunit inilarawan siyang nangibang-bansa para sa mas magandang oportunidad at suportahan ang kaniyang pamilya.
Nagpaabot din ng pakikiramay ang Konsulada at iniulat na 79 na Pilipino ang ligtas, habang 12 pa ang bineberipika.
Personal namang binisita ni Migrant Workers Secretary Hans Leo Cacdac ang pamilya ng nasawi at ipinaabot ang pakikiramay ni Pangulong Ferdinand Marcos Jr. sa naulialng pamilya ng nasawkng OFW.
Tiniyak naman ng kalihim ang pagbibigay ng tulong mula sa pamahalaan para sa pamilya, kabilang ang 10 taong gulang na anak ng OFW na nangangarap maging bumbero upang wala nang mamatay sa sunog.
Samantala, iniulat ng Overseas Workers Welfare Administration (OWWA) na kritikal ngunit stable ang kalagayan ng Pinay na si Rhodora Alcaraz, matapos masugatan habang nililigtas ang isang 3-buwang sanggol sa gitna ng apoy at makapal na usok.
Tinawag siyang makabagong bayani. Patuloy siyang binabantayan ng OWWA, DMW, at Konsulada, at tiniyak din ang pagtulong sa kanyang pamilya dito sa Pilipinas.
