Itataas ng National Disaster Risk Reduction and Management Council (NDRRMC) ang kanilang alert status sa “Blue Alert” simula sa Linggo, Enero 7, bilang paghahanda sa “Traslacion” 2024 o ang taunang Pista ng Itim na Nazareno.
Inaasahang dadalo ang nasa dalawang milyong mananampalatayang Katoliko sa prusisyon ng imahen ng Itim na Nazareno mula Quirino Grandstand hanggang Quiapo Church sa Maynila sa Martes, Enero 9.
Upang matiyak ang kaligtasan ng mga deboto, sinabi ni NDRRMC Executive Director Ariel Nepomuceno na ang alert status ng NDRRM Operations Center ay itataas sa Blue Alert.
Ito ay tumutukoy sa stand-by condition na kahandaan na nangangailangan ng hindi bababa sa 50 porsiyento ng tauhan at kanilang mga kagamitan.
Samantala, sinabi ni Nepomuceno na ang isang incident management team (IMT) na pinamumunuan ng Manila City DRRM Office ay isaaktibo upang subaybayan ang sitwasyon at pamahalaan ang mga insidente na maaaring makaharap sa prusisyon.
Idinagdag niya na ang OCD regional office sa National Capital Region (NCR) ay nakipag-ugnayan sa Manila DRRM Office kaugnay sa paghahanda para sa Traslacion 2024.
