ILOILO CITY – Nakasentro sa coronavirus disease (COVID-19) response ang selebrasyon ng Linggo ng Kabataan sa susunod na buwan.
Sa eksklusibong panayam ng Bombo Radyo Iloilo kay Andre Garcia, National Deputy President ng Kabataan sa Kartilya at Youth Week Event Chairman, sinabi nito na gaganapin ang virtual celebration ng Youth Week 2020 na may temang “Be the JUAN” na gaganapin sa Agosto 10 hanggang 14.
Ayon kay Garcia, lumilikom din ng pondo ang nasabing youth organization upang matulungan ang mga kabataan na nais makapag-enrol para sa school year 2020-2021 ngunit walang gadget at walang sapat na internet connection.
Inaasahan din aniya na makakatulong ang pondo upang makabili ng grocery package para sa mga pamilyang walang sapat na pagkain dahil sa krisis.
Inanunsyo rin ni Garcia na sa Agosto 13, ay magiging bahagi ng virtual celebration ng mga kabataan si Miss Universe 2015 Pia Alonzo Wurtzbach.
