Sa gitna ng mainit pa rin na issue ng House Speakership, nagkita sina Marinduque Rep. Lord Allan Velasco at presidential daugher na si Davao City Mayor Sara Duterte-Carpio.
Kilalang malapit na magkaibigan na dalawa. Si Velasco, inaasahang uupo na bagong House Speaker sa ilalim ng term-sharing agreement nila ni Taguig-Pateros Rep. Alan Peter Cayetano noong nakaraang taon.
Makikita sa isang larawan na magkasama sina Velasco at Duterte-Carpio na kumakain. Walang impormasyon kung nakaninong bahay ang dalawa.
Pero ayon sa kilalang kaalyado ni Velasco na si Oriental Mindoro Rep. Salvador Leachon, malinaw na ineendorso na ng anak ng presidente ang bagong lider ng Kamara.
“Mayor Sara Duterte has endorsed Cong. Lord Velasco as the next Speaker of the House of Representatives anytime this week but without interruption on the budget deliberation,” ani Leachon sa isang mensahe.
“She’s doing it as a friend of Cong. Velasco. Besides, she believes that parties to the term-sharing agreement must be gentleman enough to comply,” dagdag ng kongresista.
Sa ilalim ng kasunduang term-sharing, 15 buwan lang uupo bilang House Speaker si Cayetano, habang itutuloy ni Velasco ang natitirang 21 buwan ng 18th Congress.
“Non-adherence to agreement is a defiance to her father, as I perceive any daughter would feel, and we can’t deny it because there can be no interpretation other than that,” dagdag na hirit ni Leachon.
