Nagsalita na rin ang international community laban sa mga kasong isinampa ng Philippine National Police-Criminal Investigation and Detection Group (PNP-CIDG) kay Vice Pres. Leni Robredo at iba pang miyembro ng oposisyon kaugnay ng Bikoy controversy.
Ayon kay Brad Adams, Asia director ng New York-based organization na Human Rights Watch, malinaw na tangka ito ng administrasyon para i-harass at patahimikin ang mga kritiko ni Pangulong Duterte.
Sinasalamin din daw nito ang umano’y mataas na kaso ng human right violation sa ilalim ng kasalukuyang administrasyon.
“Threatening criminal charges against the vice president, outspoken bishops and rights lawyers suggests that Duterte’s egregious human rights record is catching up with him.”
“Philippine authorities should drop cases for inciting sedition and other offenses against opposition politicians, religious leaders, and human rights advocates.”
Giit ni Adams, kapansin-pansin na isinampa ng pulisya ang patung-patong na kaso ilang linggo matapos aprubahan ng United Nations Human Rights Council (UNHRC) ang panukalang imbestigasyon sa war on drugs campaign ng pamahalaan.
“Friends of the Philippines should not stay silent when the administration retaliates against those promoting respect for human rights in the country.”
Mismong si Robredo na ang luminaw sa akusasyon at sinabing walang kinalaman sa mga pahayag ni Peter Joemel Advincula o alyas Bikoy.
Pinuna rin ng bise presidente ang tila pagpatol ng gobyerno sa mga statement ni Advincula na malinaw umanong walang basehan.
Reklamog sedition, inciting to sedition, cyber libel, libel, estafa, harboring a criminal at obstruction of justice ang inihain ng PNP-CIDG sa Department of Justice.
Bukod kay Robredo, damay din sa mga kason ang ilang mambabatas at kandidato ng Liberal Party, Catholics Bishops’ Conference of the Philippines at Integrated Bar of the Philippines.
