Ibinida ni Department of the Interior and Local Government (DILG) Secretary Jonvic Remulla ang nakatakdang pagbili ng ahensya ng nasa 1,500 na bagong fire trucks para sa Bureau of Fire Protection (BFP). Ang mga nasabing kagamitan ay kukunin mula sa South Korea sa pamamagitan ng direct Government-to-Government (G2G) agreement.
Inihayag ng kalihim na luluwas siya ng bansa sa susunod na dalawang linggo upang personal na makipag-ugnayan at makipagpulong sa gobyerno ng South Korea. Pakay ng biyahe na pormal na lagdaan ang kasunduan at tiyakin ang maayos na detalye ng procurement.
Binigyang-diin ni Remulla na ang proyektong ito ang itinuturing na pinakamalaking investment ng Department of the Interior and Local Government (DILG) sa kagamitan ng Bureau of Fire Protection (BFP). Ipinagmalaki rin ng opisyal na isinagawa ang buong proseso nang walang anumang bahid ng korapsyon.
Sa ilalim ng deal, mabibili ang bawat fire truck sa halagang P10 milyon. Mas mababa ito ng P6 milyon kumpara sa mga nakaraang procurement ng BFP na umaabot sa P16 milyon bawat unit, kaya’t tinatayang makakatipid ang pamahalaan ng hanggang P9 na bilyon sa loob ng tatlong taon.
Dahil sa direktang kasunduan sa pagitan ng dalawang gobyerno, walang third-party middleman o supplier na makakasingit sa transaksyon. Titiyakin din ng DILG na ang mga kukuning unit ay matitibay, de-kalidad, at angkop sa mga pangangailangan ng bansa sa pag-apula ng sunog.
Ipapamahagi at ide-deploy ang 1,500 fire trucks sa iba’t ibang munisipyo sa buong Pilipinas. Nakatakdang dumating ang unang batch na 150 units simula Enero 2027, habang ang kabuuang bilang ay target na makumpleto sa loob ng 18 buwan hanggang tatlong taon.
Sa pamamagitan ng proyektong ito, inaasahang mabibigyan na ng sariling fire truck ang bawat bayan sa bansa upang mas mapabilis ang responde sa mga sakuna at emergency.
