Kinumpirma ng Joint Task Force Central ng 6th Infantry Division ng Philippine Army na nasawi sa kanilang operasyon ang spokesperson at financial officer ng Islamic State of Iraq and Syria-East Asia (ISIS-EA) sa ikinasang joint operation sa Maguindanao.
Ayon kay Western Mindanao Command (WESMINCOM) spokesperson Major Andrew Linao, nagsanib pwersa ang 601st Infantry Brigade, 40th Infantry Battalion, at mga intelligence unit para sa special operation laban sa high value target na terorista sa Barangay Poblacion, Datu Saudi Ampatuan, Maguindanao kahapon ng hapon.
Kinilala ni Major Linao ang nasawi na si Abdulfatah Omar Alimuden, o mas kilala sa tawag na Abu Huzaifah.
Sinabi ni Linao, bukod sa pagiging spokesperson ng ISIS-EA, si Abu Huzaifah ay sangkot din umano sa mga financial transactions ng Daulah Islamiyah-Philippines sa ISIS Central.
Samantala, binati naman ni Western Mindanao Command chief, Lt. Gen. Alfredo Rosario, Jr. ang mga tropa na nakapatay kay Abu Huzaifah.
