Pansamantalang isasara ang ilang kalsada sa lungsod ng Maynila simula ngayong Lunes, Pebrero 16 hanggang bukas, Pebrero 17 kasabay ng selebrasyon ng Chinese New Year.
Sa inilabas na advisory ng pamahalaang lungsod ng Maynila, kabilang sa mga isasarang road sections ay sa may Binondo-Intramuros Brigde simula kaninang alas-tres ng madaling araw, sa Jones Bridge (southbound) dakong alas-siyete ng hapon, at Jones Bridge (northbound) bandang alas-nwebe ng gabi.
Pagsapit ng alas-diyes ng gabi, isasara ang mga sumusunod na daanan sa may Plaza Lorenzo Ruiz u-turn access mula Juan Luna St. hanggang Quintin Paredes St.; Ongpin St. mula Juan Luna St. patungong Quintin Paredes St.; kahabaan ng Quinto Paredes St. mula Dasmariñas St. patungong Escolta St.; Jones Bridge; Juan Luna St. mula Dasmariñas St. patungong Muelle de la Industria; Binondo-Intramuros Bridge at Plaza Cervantes.
Ipapatupad din ang mga sumusunod na rerouting schemes: ang mga sasakyang manggagaling sa Luna St. ay maaaring dumaan sa Jones Bridge (southbound) saka lumiko sa Dasmarinas St, saka lumiko pakaliwa patungong Muelle de Binondo, kumaliwa sa Muelle de la Industria, dumiretso sa Muelle Banco de Nacional patungong Plaza Sta. Cruz patungo sa destinasyon.
Ang mga sasakyan namang magmumula sa P. Burgos Ave sa may northbound, maaaring dumaan sa Jones Bridge saka dumiretso sa MacArthur Bridge o Quezon Bridge patungo sa destinasyon.
Para sa iba pang alternatibong ruta, maaaring sumangguni sa Manila Public Information Office facebook page.
Kaugnay nito, inanunsiyo rin ng Metropolitan Manila Development Authority (MMDA) ang suspensiyon ng expanded number coding scheme para bukas kasabay ng taunang selebrasyon.
