Opisyal nang nagsumite ng entry of appearance ang 11-miyembro ng prosecution panel ng Kamara de Representantes nitong Lunes, alas-5:32 ng hapon, sa Senate Impeachment Court para sa nalalapit na paglilitis kay Vice President Sara Duterte,matapos manumpa ang mga senador at magtipon bilang isang tribunal.
Ang “Formal Entry of Appearance” ay personal na inihain sa Senate Impeachment Court ni House Secretary General Cheloy Garafil para sa mga taga-usig na inihalal ng mababang kapulungan.
Ang paghahaing ito ay hudyat ng kahandaan ng Kamara na magpatuloy sa makasaysayang impeachment trial matapos bumoto ang kapulungan ng 257-25, at siyam na abstention, upang i-impeach si Duterte at ipasa ang Articles of Impeachment sa Senado.
Sa tatlong-pahinang mosyon, pormal na nagpakita ang 11 mambabatas ng Kamara sa impeachment court bilang mga public prosecutors sa kaso laban kay Duterte.
Pinangalanan sa mosyon si House Committee on Justice Chair at Batangas 2nd District Rep. Gerville “Jinky Bitrics” Luistro bilang lead public prosecutor.
Lahat ng mga proseso ng korte ay ipapadala sa pamamagitan ng Office of the Secretary General ng Kamara.
Ang dokumento ay nilagdaan ni Luistro at ng kanyang mga kapwa public prosecutors na sina Reps.: Terry Ridon (Bicol Saro Party-list); Ramon Rodrigo Gutierrez (1-Rider Party-list); Ysabel Maria Zamora (San Juan City);Lorenz Defensor (Iloilo 3rd District);Jose Manuel “Chel” Diokno (Akbayan Party-list); Leila de Lima (Mamamayang Liberal Party-list); Arlene “Kaka” Bag-ao (Dinagat Islands); Jonathan Keith Flores (Bukidnon 2nd District); Lordan Suan (Cagayan de Oro 1st District) at Joel Chua (Manila 3rd District).
