Umapela si dating Department of Public Works and Highways (DPWH) Bulacan First District Engineer Henry Alcantara sa Professional Regulation Commission (PRC) na nagpawalang-bisa sa kaniyang lisensiya bilang civil engineer.
Nauna na kasing binawi o pinawalang-bisa ng komisyon ang lisensiya ni Alcantara dahil sa gross unprofessional at unethical conduct dahil sa kaniyang pagkakadawit sa anomaliya sa flood control projects.
Sa kaniyang motion for reconsideration, hiniling ni Alcantara sa komisyon na baliktarin, isantabi at ipawalang-bisa ang rebokasyon o pagbawi sa kaniyang professional license bilang civil engineer.
Ikinatuwiran ni Alcantara, sa pamamagitan ng kaniyang abogado na si Atty. Maria Nympha Mandagan, na nakagawa umano ng “gross misapprehension of facts” ang komisyon sa pagtukoy na guilty o nagkasala sa batas si Alcantara.
Giit pa ng dating district engineer sa kaniyang mosyon na ang resulta ng imbestigasyon ng DPWH sa kaniyang kasong administratibo ay hindi pa pinal dahil mayroong inihaing motion for reconsideration ang kaniyang kampo sa ahensiya.
Gayundin nakabinbin ang imbestigasyon ng Office of the Ombudsman sa administrative case ni Alcantara at hindi pa nareresolba.
Natanggap naman ng PRC Legal Service ang apela ni Alcantara nitong araw ng Miyerkules, Enero 14.
