Naglaan ang Government Service Insurance System (GSIS) ng P6 bilyon ngayong taon bilang emergency loan budget para matulungan ang mga miyembro at pensioner na maaaring maapektuhan ng mga kalamidad.
Ibinunyag ito ng state insurance company kaugnay ng pagpasok ng super typhoon sa Philippine area of responsibility (PAR), na nagbabanta sa ilang bahagi ng bansa.
Ayon kay GSIS President at General Manager Wick Veloso sa isang pahayag, ito ay upang magarantiya ang tulong sa pautang sa mga miyembro at pensiyonado na nangangailangan sa panahon ng kalamidad.
Ipinaliwanag ng nasabing kumpanya na ang mga miyembro at pensioner na may umiiral nang balanse sa emergency loan ay maaaring humiram ng hanggang P40,000 para mabayaran ang kanilang nakaraang balance sa emergency loan at makatanggap pa rin ng maximum net amount na P20,000 para sa isang bagong loan.
Sa kabilang banda, ang mga miyembro at pensiyonado na walang umiiral na emergency loan ay karapat-dapat ding mag-aplay para sa pautang na P20,000.
Ang emergency loan mula sa Government Service Insurance System ay may anim na porsyentong interest rate na kung saan maaari itong bayaran sa loob ng tatlong taon.
Kasama rin dito ang feature ng redemption insurance, na nagsisiguro na ang balanse ay ituturing na ganap na mabayaran kung sakaling mamatay ang nanghihiram, hangga’t ang mga pagbabayad ay napapanahon.
Ang mga pensioners ay mayroon ding alternatibong option na mag-aplay para sa pinahusay na Pension Loan program, na nagpapahintulot sa kanila na humiram ng alinman sa hanggang anim na buwang halaga ng kanilang pensiyon o hanggang P500,000.
