Dismayado ang mga tagasuporta ni dating Pangulong Rodrigo Duterte sa desisyon ng International Criminal Court (ICC) Appeals Chamber na ibasura ang kahilingan para sa kanyang interim release.
Ayon kay Atty. Manuelito Luna sa panayam ng Bombo Radyo, umaasa sila na pagbibigyan ang apela dahil sa kalagayan ng dating lider, partikular na sa usapin ng kanyang kalusugan.
Nanawagan si Luna sa mga tagasuporta na manatiling mahinahon at iwasan ang padalos-dalos na aksyon, bagaman aminado siyang hindi mapipigilan ang ilang indibidwal na maglabas ng saloobin at himutok.
Sa huli, sinisi ni Luna ang Marcos administration sa pagpapadala kay Duterte sa The Hague upang doon mabilanggo, imbes na dito sa Pilipinas kasuhan kung mayroon mang batayan.
Samantala, sa panig ng mga kaanak ng mga biktima ng war on drugs, ipinahayag ni Atty. Gilbert Andres, isang ICC-accredited lawyer, ang kanilang kasiyahan sa desisyon.
Aniya, inaasahan na nila ang resulta ngunit mas masayang marinig mismo ang pagbasa ng pasya dahil nakikita nila ito bilang simula ng tagumpay para sa karapatang pantao na ipinagkait sa mga biktima ng kampanya kontra droga.
