Hinamon ni Kamanggagawa Party-list Representative Elijah San Fernando si Department of Trade and Industry (DTI) Secretary Cristina Roque sa “P500 Noche Buena Challenge” para patunayang kasya ang naturang halaga para sa simpleng noche buena.
Sa ibinahaging video post ng mambabatas, hinamon niya si DTI chef na gawin ang naturang challenge kung naniniwala at naninindigan siyang kasya ang halagang limang daan para sa noche buena.
Inalok din ng kongresista ang kalihim na mamili ng lugar o palengke na pupuntahan at kaniya itong sasamahan.
Giit ng mambabatas, ang pahayag ng kalihim ay insulto sa bawat manggagawa at ordinaryong Pilipino. Aniya, bagamat totoo na hindi kailangang magarbo ang handaan, tanong ni San Fernando kung ano ba daw ang kayang bilhin ng limang daan na simple at disenteng Noche Buena para sa isang pamilya?
Saad pa ni San Fernando na ang naging pahayag ng DTI ay lalo pang nakasira sa tiwala ng publiko lalo na sa panahon na ramdam ng mga pamilya ang pasaning dala ng mataas na presyo ng mga bilihin, walang paggalaw sa sahod at walang katiyakan dulot ng iskandalo sa flood control anomaly.
Una rito, nanindigan si Sec. Roque na kasya ang P500 para sa noche buena sa darating na Pasko. Subalit nilinaw ng kalihim na nakadepende pa rin ito sa bilang ng miyembro ng pamilya at mga ihahandang pagkain. Paliwanag pa ng opisyal na mayroong available packages at bundles sa merkado upang makatipid at nagpatupad na rin ng price freeze sa basic at prime commodities hanggang sa Enero 2026 kayat walang pagtaas sa naturang mga produkto.
