Isang delegasyon mula sa Department of National Defense (DND) ang bumisita sa dalawang pangunahing South Korean defense equipment manufacturer.
Ito ay sa gitna ng lumalakas na panawagan mula sa iba’t ibang sektor na pabilisin ang isinasagawang Armed Forces of the Philippines Modernization Program (AFPMP) bilang tugon sa mga tensyon sa West Philippine Sea.
Sinabi ng DND na ang delegasyon, na pinamumunuan ni Senior Undersecretary Irineo Espino, ay naglibot sa Hanwha Ocean at HD Hyundai Heavy Industries (HHI) sa sideline ng kanilang paglahok sa 12th Seoul Defense Dialogue (SDD) at Seoul International Aerospace at Defense Exhibit (ADEX).
Ang Hanwha Ocean ay nag-aalok ng kanilang Jangbogo IIPN submarine para sa iminungkahing submarine project ng modernization program.
Si Espino at ang mga delegado ay binigyan ng paliwanag tungkol sa iminungkahing kakayahan ng submarine at nilibot ang mga pasilidad sa pagpapanatili at paggawa ng barko ng Hanwha Ocean sa Geoje City, South Korea.
Sinabi rin ng DND na binisita ng delegasyon ang mga pasilidad ng nasabing industriya sa Ulsan at binigyang-diin ang progreso ng pagtatayo ng dalawang missile corvette na kung saan ang una ay inaasahang maihahatid sa Pilipinas sa 2025 at ang pangalawa sa taong 2026.
