(Update) BACOLOD CITY – Nakakulong na ang isang disk jockey (DJ) sa Dumaguete City, Negros Oriental matapos madakip sa drug buy bust operation kagabi.
Ayon sa Dumaguete City Police Station, si Marlon dela Cruz na gumagamit ng radio name na Major Blanco at residente ng Barangay East Balabag, Valencia, Negros Oriental ay nahuli sa Barangay Bagacay, Dumaguete City, alas-9:40 kagabi.
Nakuha sa pag-iingat nito ang 11 sachet ng suspected shabu na may bigat na six grams at tinatayang nagkakahalaga ng halos P50,000.
Ang nabanggit na operasyon ay isinagawa ng pinagsanib na pwersa ng Police Regional Office-7 Drug Enforcement Unit, Negros Oriental Provincial Drug Enforcement Unit at Dumaguete City Police Station.
Ayon sa mga pulis, si Dela Cruz ay itinuturing na high value individual sa illegal na droga.
Sa ngayon, inihahanda na ng mga pulis ang kasong paglabag sa Republic Act 9165 o Comprehensive Dangerous Drugs Act of 2002 na isasampa laban sa DJ.
