Isinasantabi ng Department of Education (DepEd) ang mga panukalang maglagay ng air conditioner sa mga pampublikong paaralan sa gitna ng matinding init, at sinabing mayroon itong financial constraints at iba pang solusyon sa problema.
Inilabas ni DepEd spokesperson Michael Poa ang pahayag matapos sabihin ni Parents-Teachers Association (PTA) Federation president Willy Rodriguez na dapat gawing air-conditioned ang mga silid-aralan upang matugunan ang mga pagkagambala sa pag-aaral sa ilang lugar dahil sa init.
Naalala ni Rodriguez na noong 2013, nakakolekta ang Parents-Teachers Association o PTA ng mga lumang aircon units at nakabili rin ng mga bago na ilalagay sa ilang silid-aralan.
Ang solusyon diyan aniya, ay hindi pagbabago ng kalendaryo o modular learning.
Ani Rodriguez, ang solusyon ay magkaroon ng airconditioned na mga silid-aralan sa mga pampublikong paaralan.
Bilang tugon, sinabi ni Poa na ang Departamento ng Edukasyon ay may mga paghihigpit sa budget, ngunit iginiit na maaari pa ring magpatuloy ang mga klase sa kabila ng mainit na panahon sa pamamagitan ng mga alternatibong paraan.
Nauna nang sinabi ng DepEd na may discretion ang mga school head na suspindihin ang face-to-face classes at lumipat sa modular distance learning dahil sa matinding init at pagkawala ng kuryente na nararanasan sa ilang bahagi ng bansa.
