Iniimbestigahan na raw ng National Privacy Commission (NPC) ang ulat tungkol sa kaso ng umano’y data breach sa student portal ng Far Eastern University.
Sinabi ni Privacy commissioner Raymund Liboro sa isang panayam, na dapat maging responsable ang school officials sa pagsisiguro na ligtas ang kani-kanilang information technology systems.
“We call on school officials to fortify their information systems. As schools shift to digital operations and virtual learning systems in the wake of the pandemic, they must prioritize the security of their IT infrastructures,” ani Liboro.
Sa isang liham para sa Securities and Exchange Commission at Philippine Stock Exchange, ipinaalam ng FEU na posibleng nakompromiso ang kanilang student portal kung saan nakalagay ang datos ng bawat estudyante.
Ayon kay FEU acting corporate secretary Atty. Anthony Goquingco, kumilos na ang tauhan ng unibersidad para tugunan ang kaso.
“Our information technology team in coordination with external consultants, are investigating the matter with the aim of implementing further cybersecurity measures.”
Bukod sa FEU, sinisilip na rin daw ng Privacy commission ang IT security breach sa San Beda University.
