Tiniyak ng Department of Health (DOH) na hindi matutulad sa disgrasya ng anti-dengue vaccine na Dengvaxia ang gagawing clinical trials sa Pilipinas ng ilan sa mga developed vaccines para sa COVID-19.
Ayon sa DOH, bago aprubahan ng Food and Drug Administration (FDA) ang bakuna sa clinical trials ay dapat itong maaprubahan sa ethics at technical review.
“Ang Ethics Review ay upang mapatunayan na mayroong benefit over risk ang pag gamit ng gamot, at ang pagsasagawa ng clinical trial ay hindi lalabag sa karapatang pantao.”
“Samantalang ang Technical Review ay upang masigurong walang bias sa pagconduct ng trial, at ang pagsasagawa nito ay susunod sa accepted international standards – Good Clinical Practice.”
May mga ipinapatupad daw na polisiya ang FDA ukol sa exemption, para magkaroon agad ng access sa mga pinag-aaralang lunas sa COVID-19 ang ilang pasyente.
“Gaya ng nasabi na, ang mga pasyente na hindi maaaring maisama sa clinical trial pero sa pagtataya ng doktor ay nangangailangan ng gamot ay maaring mag-apply ng CSP (Compassionate Special Permit). Ang CSP ay isang permit na prebilihiyo na ginagamit sa ilalim ng superbisyon ng doktor.”
Bukod sa approval na manggagaling sa FDA, kailangan din daw maka-secure ng license to operate ang manufacturers ng pinag-aaralang COVID-19 vaccines, para masigurong protektado ang kaligtasan at karapatan ng mga gagamit na pasyente.
“Ang Preclinical Studies kung saan ang testing ay ginagawa sa mga hayop ay ginagawa upang ma-establish ang posibleng benepisyo ng isang gamot laban sa sakit at ang safety nito para ma-test sa isang clinical trial na ang lumalahok ay human subjects.”
Sa isang panayam ipinaalala ni FDA director general Eric Domingo ang iba’t-ibang side effects sa tao ng pinag-aaralan pang COVID-19 vaccines.
Isinusulong ng pamahalaan ang agarang pagsisimula ng clinical trials sa Pilipinas ng Russian-developed vaccine na Sputnik V.
