Pangungunahan nina Olympic gold medalist Carlos Yulo at nakababatang kapatid niyang si Karl Eldrew Yulo ang Philippine gymnastics team sa 2026 Asian Games sa Japan.
Kasama ng Yulo brothers sa men’s artistic gymnastics team sina Juancho Miguel Besana, Justine Ace de Leon, at Zachary Cortins Nuñez.
Sa women’s artistic gymnastics naman, pangungunahan ng Olympian na si Levi Ruivivar ang koponan kasama sina Kylee Kvamme, Chiara Dawn Andrew, Lauren Supnet, at Haylee Garcia.
Sa rhythmic gymnastics, kabilang sa roster sina Breanna Labadan at Jasmine Ramilo, habang sina Jerry Ilano Jr. at Luvicar Janine Padilla naman ang kakatawan sa Pilipinas sa trampoline gymnastics.
Target ng Philippine gymnastics team na makasungkit ng kauna-unahang medalya ng bansa sa gymnastics sa kasaysayan ng Asian Games.
Gaganapin ang 2026 Asian Games mula Setyembre 19 hanggang Oktubre 4 sa Japan.
