Bulkang Bulusan sa Sorsogon itinaas sa Alert level 1 status mula sa ‘normal level’; nakapagtala ng kabuuang 126 quakes simula kahapon -PHIVOLCS

LEGAZPI CITY- Muling itinaas sa Alert level 1 status mula sa ‘normal level’ ang Bulkang Bulusan sa lalawigan ng Sorsogon.

Batay sa abiso ng PHIVOLCS dakong alas-3:00 ngayong hapon, pumalo sa 126 na mahina at mababaw na mga volcanic earthquakes ang naitala sa bulkan mula pa alas-5:00 ng madaling-araw kahapon, Oktubre 11, 2022.

Karamihan umano sa mga pagyanig ay natukoy sa northwestern sector at summit area ng Bulusan na iniuugnay sa proseso ng pagbasag ng bato sa edipisyo.

Maliban pa ito sa pagtaas ng namataang hydrothermal activity at overall unrest sa bulkan.

Kasunod nito, patuloy ang abiso ng ahensya at ng mga lokal na pamahalaan sa lalawigan ng ibayong pag-iingat at paghahanda ng publiko.