Nagbabala ngayong ang Bureau of Immigration (BI) sa publiko laban sa mga human traffickers dahil bumalik na raw ang mga ito sa kanilang operasyon matapos luwagan ang mga quarantine protocols dahil sa Coronavirus disease 2019 (COVID-19).
Kasunod na rin ito ng pagkakaharang sa dalawang Pinay sa Ninoy Aquino International Airport (NAIA) na hinihinalang biktima ng human trafficking.
Sinabi ni BI Commissioner Jaime Morente sa isang statement na huwag agad maniwala sa mga hindi magandang aktibidad ng mga sindikato na walang awang nambibiktima sa ating mga kababayan sa gitna ng covid pandemic.
“We are warning our kababayans not to fall prey to the nefarious activities of these syndicates who do not feel any remorse in preying on their poor countrymen amidst the continuing COVID-19 pandemic,” ani Morente.
Dahil dito, inabisuhan ni Morente ang mga immigration officers sa airport na doblehin ang kanilang pagiging mapagmatyag at pigilan ang pag-alis ng mga pasahero na base sa kanilang assessment ay posibleng biktima ng human trafficking at illegal recruitment.
Una rito, dalawang babaeng pasahero raw na papuntang United Arab Emirates (UAE) ang pinigilan ng BI officers na makaalis sa NAIA noong nakaraang linggo dahil sa mga pekeng fraudulent travel documents.
Sinabi ni BI Travel Control and Enforcement Unit (TCEU) Head Ma. Timotea Barizo, pasakay raw ang mga pasahero sa Philippine Airlines flight na patungong Dubai noong Setyembre 1 nang maharang amg mga ito sa immigration departure sa NAIA Terminal 1.
Inamin umano ng mga ito pupunta sila sa ibayong dagat para magtrabaho pero ang Overseas Employment Certificates (OECs) daw na iprinisinta ng mga ito ay palsipikado.
“We were able to rescue these victims due to the vigilance of our primary inspectors who doubted the authenticity of their travel papers and referred them for secondary inspection instead of clearing them for departure. Like other victims we previously offloaded, these women also claimed that their trip was arranged and their documents were processed by people they met over Facebook and that their papers were only given to them outside the airport before they checked-in for their flight,” ani Barizo.
Ang mga kababaihan ay agad namang itinurn-over sa Inter-Agency Council Against Trafficking (IACAT) NAIA Task Force para sa masusing imbestigasyon.
