Nagpaalala ang Manila Police District (MPD), na mahigpit na ipinagbabawal ang anumang gamit na pantakip sa mukha sa isasagawang anti-corrruption rally ngayong araw, November 30.
Iginiit ng MPD sa isang video advisory na hindi pinahihintulutan ang pagsusuot ng face mask o anumang bagay na nagtatago ng pagkakakilanlan, alinsunod sa City Ordinance 9134.
Ipinagbabawal ng naturang ordinansa ang paggamit ng balaclava, ski mask, face mask, helmet, sombrero at hoodie ng mga motorcycle rider kapag pumapasok sa mga establisimyento o bumababa mula sa kanilang motorsiklo.
Hinimok din ng MPD ang mga lalahok sa protesta na huwag magdala ng mga ipinagbabawal na gamit tulad ng Molotov bomb, paputok, bakal o kahoy na pamalo, tirador, malalaking payong at alak.
Inaasahang lalagpas sa 300,000 ang bilang ng mga lalahok sa Trillion Peso March.
Mahigit 15,000 pulis naman ang ide-deploy ng Philippine National Police (PNP) para sa isasagawang anti-corruption protest
Gaganapin ang mga kilos-protesta sa EDSA People Power Monument sa Quezon City at sa Quirino Grandstand sa Maynila.
