Lumilitaw ang tensyon sa pamilya ng yumaong National Artist at Superstar na si Nora Aunor sa mismong unang anibersaryo ng kanyang pagpanaw nitong Huwebes, Abril 16.
Sa gitna ng pagtitipon ng mga tagasuporta at pamilya sa Libingan ng mga Bayani sa Taguig City, lumabas ang isyu tungkol sa umano’y sigalot sa pagitan ng kanyang mga anak na sina Ian de Leon at Lotlot de Leon.
Ayon sa ulat, iginiit ni Ian na siya ang “sole legal heir” ng kanyang ina at siya ang mangangasiwa sa mga legal na usapin ng estate nito, kabilang ang plano para sa isang One Person Corporation (OPC).
Paliwanag ng kampo ni Lotlot de Leon sa pamamagitan ng kanyang abogado na si Atty. Mark Julius C. Estur, hindi umano interesado ang kanyang kliyente sa anumang mana mula sa ari-arian ng kanilang ina.
Ayon sa kanila, hindi siya kinonsulta sa mga naturang hakbang at hindi rin siya bahagi ng anumang fundraising o pamamalakad na ginagawa ni Ian.
Nilinaw din ng kampo ni Lotlot na wala silang alam na naiwang Last Will and Testament na nagbibigay ng kontrol sa kanyang kapatid. Iginiit din nila na hindi habol ni Lotlot ang anumang mana at mas pinipili niyang umiwas na lamang sa isyu upang igalang ang alaala ng kanilang ina.
Ayon pa sa pahayag, may hiwalay na charitable foundation na itinayo si Lotlot kasama ang kanyang mga kapatid, na dati umanong alam at sinuportahan ni Ian, ngunit kalaunan ay itinanggi niya ang kaalaman dito.
Si Nora Aunor ay pumanaw noong Abril 16, 2025 dahil sa acute respiratory failure at inilibing bilang bahagi ng state funeral sa Libingan ng mga Bayani bilang pagkilala sa kanyang ambag sa sining at kultura ng bansa.
Sa kabila ng isyu sa pamilya, nagtipon pa rin ang mga kaanak at tagahanga sa isang pribadong paggunita sa Eastwood City upang alalahanin ang buhay at legacy ng yumaong Superstar.
