Umakyat na sa libu-libong residente sa Metro Manila ang pilit na lumikas mula sa kani-kanilang mga tahanan patungo sa mga evacuation center dahil sa patuloy na pagbuhos ng ulang dala ng Hanging Habagat.
Sa lungsod ng Quezon, mahigit 5,400 na mga indibidwal ang pansamantalang nananatili ngayon sa mga temporary shelter.
Sa kabila nito, may magandang balita para sa mga commuters at residente dahil unti-unti nang humuhupa ang baha sa ilang bahagi ng Araneta Avenue sa nasabing lungsod.
Samantala, matinding apektado rin ang Pasig City kung saan umabot na sa 1,970 pamilya o kabuuang 7,061 na indibidwal ang kasalukuyang sumisilong sa mga evacuation center habang binabantayan ang pagbuti ng panahon.
Sa Maynila naman, halos 500 indibidwal ang pinalilikas dahil sa mabilis na pagtaas ng tubig-baha. Nananatili namang hamon sa mga biyahero at motorista ang ilang kalsada sa lungsod na manatiling lubog pa rin sa baha hanggang sa kasalukuyan.
Patuloy ang monitoring ng mga local government unit (LGU) at disaster risk reduction management offices sa kalagayan ng mga bakwit at sa lagay ng kalsada sa buong kalakhang Maynila.
