Itinuturing ngayon ng White House na ang nangyaring pamamaril sa Annunciation Catholic School sa Minneapolis ay isang uri ng ‘hate crime’.
Sinabi ni White House press secretary Karoline Leavitt na base sa imbestigasyon ng FBI ay tinarget ng 23-anyos na suspek na si Robin Westman ang mga Katolika.
Ibinase nila ang nasabing pahayag sa mga nakuhang manifesto ng suspek sa kanilang social media account.
Aabot nasa 18 katao ang sugatan kung saan 15 dito ay mga bata na may edad anim hanggang 15 habang tatlo ang nasa hustong gulang na.
Magugunitang dalawang biktima ang nasawi na may edad walo at 10 habang karamihan sa mga nasugatang biktima ay nakalabas na ng pagamutan.
Dahil na rin sa pangyayari ay ipinag-utos ni Minnesota Governor Tim Walz ang paglalagay ng kapulisan sa mga paaralan para hindi na maulit ang mga pamamaril.
