Binanggit ni Manila Rep. Bienvenido Abante Jr. sa House hearing na hindi puwedeng hatiin ang pagkatao ni VP Sara Duterte sa kanyang tungkulin bilang vice president at dating DepEd secretary.
Ani Abante, ayon sa “single personality doctrine,” ang mga aksyon ni Duterte bilang DepEd chief ay bahagi rin ng kanyang obligasyon bilang vice president, kaya ang impeachment case ay dapat naka-base sa kanyang kabuuang tungkulin sa pampublikong serbisyo.
Ito ay tugon sa pahayag ni Cagayan de Oro 2nd District Rep. Rufus Rodriguez, na kumukuwestiyon sa hurisdiksyon ng House Justice Committee sa mga aksyon ni Duterte bilang dating DepEd secretary.
Sinabi naman ni Bukidnon Rep. Jonathan Keith Flores, vice chair ng committee, na dapat nakatuon ang mga miyembro sa “sufficiency in substance” ng ikaapat na impeachment complaint, at ang desisyon kung gagamitin ni Duterte ang kanyang depensa bilang DepEd secretary ay nasa kanya.
Binigyang-diin nina Rep. Joel Chua at Abante na ang pagiging DepEd chief ni Duterte ay nakabase sa kanyang pagka-vice president, ayon sa Saligang Batas 1987, at hindi puwedeng hiwalayin sa impeachment proceedings. (report by Bombo Jai)
