Itinanggi ng Ukraine Embassy sa Maynila ang akusasyon ng Russia ng nagre-recruit ito ng mga Pilipino para makipaglaban kasama ng mga sundalong Ukrainian sa giyera kontra Russia.
Sa isang statement, pinabulaanan ng Embahada ang pahayag ni Russian Foreign Ministry spokesperson Maria Zakharova na nagi-enlist ang isang US-based security company ng mga Filipino nationals para ipadala sa Ukraine.
Ayon pa sa Foreign Minister, pinangakuan umano ang mga ni-recruit na Pilipino ng US$5,000 o katumbas ng P293,000 na bayad kada buwan at sasanayin ng American instructors.
Subalit, pinasinungalingan ito ng Ukraine Embassy bilang isang “baseless fabrication” at bahagi lamang ng mas malawak na “systematic disinformation campaign” ng Russia na naglalayong siraan ang Ukraine at defense forces nito.
Sa huli, iginiit nito ang matibay, friendly at dynamic bilateral relations sa pagitan ng Ukraine at Pilipinas na nabuo sa pamamagitan ng mutual respect, tiwala at magkatuwang na paninindigan sa international law.
