Upang maiwasan ang posibleng pagkapigil o pagkaantala sa pagtanggap ng buwanang pensyon, mahigpit na pinapayuhan ng Social Security System (SSS) ang mga piling pensiyonado na tapusin ang kanilang Annual Confirmation of Pensioners o ACOP compliance bago matapos ang buwan ng Abril.
Partikular na inaatasan ng ahensya na magsumite ng kinakailangang dokumento ngayong buwan ang mga retirement pensioner na edad 80 pataas at nananatili sa bansa, mga total disability pensioner, at mga pensiyonado na nakabase sa ibang bansa.
Kabilang din sa mga dapat mag-comply ang mga survivor pensioner, pati na ang mga dependent children na nasa ilalim ng guardianship, lalo na kung pumatak ng Abril ang buwan ng kapanganakan ng yumaong miyembro.
Para mas mapabilis at mapadali ang proseso, hinihikayat ng SSS ang mga benepisyaryo na gawin ang online compliance sa pamamagitan ng National ID eVerify System na pinangangasiwaan ng Philippine Statistics Authority (PSA).
Samantala, nilinaw ng ahensya na nananatiling exempted sa nasabing panuntunan ang mga karaniwang retirement pensioner na naninirahan sa Pilipinas.
Gayunpaman, nilinaw ng SSS na kung ang isang retirement pensioner ay kasabay ring tumatanggap ng pensyon bilang survivor pensioner, kinakailangan nitong magsumite ng dalawang hiwalay na ACOP Pensioner’s Reply Form.
Muling iginiit ng ahensya na ang pagsunod sa ACOP sa takdang panahon ay ang pangunahing hakbang upang matiyak ang tuloy-tuloy na pagdaloy ng tulong pinansyal para sa mga benepisyaryo.
