Senado, ipinagpaliban ang mga aktibidad, bilang respeto kay ex-Sen. Oreta

Ipinagpaliban ng mataas na kapulungan ng Kongreso (Senado) ang kanilang mga nakatakdang aktibidad sa Lunes, Mayo 18, 2020 para magbigay ng respeto sa pumanaw na si dating Sen. Tessie Aquino-Oreta.

Dahil dito, isasagawa na lang ang pagdinig para sa COVID-19 response ng gobyerno sa darating na Martes (Mayo 19, 2020).

Bahagi ng tradisyon sa Senado na ilaan ang isang araw ng sesyon kapag may pumapanaw na dati o kasalukuyang senador.

Matatandaan na mismong ang anak ni Oreta na si Malabon Mayor Lenlen Oreta ang nag-anunsyo ukol sa pagpanaw ng kaniyang ina kagabi sa edad na 75.

Ang dating senadora ay kapatid ni dating Sen. Benigno “Ninoy” Aquino Jr.