Nagbabala sa publiko si Senator Panfilo “Ping” Lacson laban sa scammer na nagpapanggap na dating mambabatas para makahuthot ng donasyon.
Ito ay matapos na makatanggap mismo ang Senador ng mensahe sa Viber mula sa taong nagpakilalang si dating Occidental Mindoro Representative Josephine Sato.
Aniya, tinangka ng scammer na humingi sa kanya ng donasyon para umano sa isang bahay-ampunang nasira ng bagyo sa Occidental Mindoro.
Nagkamali naman aniya ng nilapitan ang scammer nang humingi siya ng pera para sa kunwaring pagkukumpuni ng bahay-ampunan.
Sinabi ng Senador sa kaniyang X account na alam niya ang tunay na pagkakakilanlan ng naturang scammer kabilang na ang litrato niya sa kanyang SSS ID.
“SCAMMER ON THE LOOSE: This person, misrepresenting himself as ex-Cong Nene Sato contacted the wrong guy when he asked me for financial support to rebuild a “typhoon damaged orphanage building” in Occ Mindoro. I have his real identity, even his photo on his SSS ID. GOTCHA, IDIOT!”, saad ng Senador sa kaniyang X account.
Dagdag pa niya, nagpadala rin ang scammer ng e-wallet number para umano sa donasyon.
Kaugnay nito, sinabi ni Sen. Lacson na nakikipag-ugnayan na siya sa mga awtoridad at pinaalalahanan ang publiko na mag-ingat sa mga ganitong uri ng panloloko.
