Pumayag si Russian President Vladimir Putin na makipagtulungan sa mga hakbang upang maihatid ang mahahalagang suplay sa Oleshky, isang bayang kontrolado ng Russia sa Ukraine, kasunod ng panawagan ni Pope Leo XIV.
Ayon sa Vatican, hiniling ng Santo Papa kay Putin na magpatupad ng tigil-putukan upang makapasok ang pagkain at iba pang tulong sa bayan, kung saan lumalala ang kakulangan sa suplay. Sinabi naman ng Kremlin na sinuportahan nito ang layuning matiyak ang kaligtasan ng mga residente at maihatid ang mga pangunahing pangangailangan, bagaman hindi nito binanggit ang ceasefire.
Kapwa nag-aakusa ang Russia at Ukraine sa isa’t isa ng pagharang sa mga suplay. Ayon sa United Nations, nasa 1,700 residente pa ang nananatili sa Oleshky, kabilang ang 47 bata, mula sa dating populasyon nitong humigit-kumulang 24,000.
Sa panawagan ni Pope Leo, muling binigyang-diin ng Vatican ang suporta nito sa mga inisyatiba para sa kapayapaan sa gitna ng patuloy na labanan at lumalalang krisis makatao sa Ukraine.
