Isang malaking tagumpay para sa mga karaniwang Pilipino ang panibagong pagpapalawak ng benepisyo para sa mga miyembro ng Philippine Health Insurance Corporation (PhilHealth).
Ito ang sinabi ni Speaker Ferdinand Martin G. Romualdez kasunod ng naging hakbang ng PhilHealth na palawakin ang benepisyong ipinagkakaloob nito sa kanilang mga miyembro na nangangailangan ng serbisyong medikal.
Matagal nang isinusulong ni Romualdez ang mga reporma sa pambansang sistemang pangkalusugan upang matugunan ang tunay na pangangailangan ng mga pasyente at kanilang pamilya. Aniya, ang mga bagong benepisyo ng PhilHealth ay tugon sa matagal nang hinaing na inilapit ng Mababang Kapulungan sa mga pagdinig, konsultasyon, at pakikipag-ugnayan sa mga stakeholder.
Isa sa mga unang tinutukan ay ang tulong para sa mga pasyenteng nagda-dialysis. Mula sa dating 90 session sa isang taon, ginawa na itong 156 session para matugunan ang tatlong gamutan kada linggo. Itinaas din ang bayad kada session mula ₱2,600 hanggang ₱6,350, kaya ang kabuuang tulong sa isang taon ay halos ₱1 milyon.
Tinaasan din ang tulong para sa peritoneal dialysis: ₱500,000 bawat taon para sa mga adult at ₱1.2 milyon para sa mga bata. Sakop na rin ngayon ang kidney transplant ng mga bata hanggang ₱2.1 milyon, habang ang sa mga adult ay higit ₱1 milyon, kasama na ang gamutan pagkatapos ng operasyon, mga lab test, at importanteng gamot.
Pinuri rin ni Romualdez ang pagpapatupad ng PhilHealth ng facility-based outpatient emergency care na matagal na niyang isinusulong para masigurong may tulong ang mga pasyente sa emergency room kahit hindi sila ma-admit. Tinugunan nito ang karaniwang sitwasyon kung saan napipilitang umalis ang mga pasyente sa ER dahil walang pambayad.
Pinalawak din ng PhilHealth ang tulong para sa mga may sakit sa puso, isa rin sa mga isyung binigyang-diin ng Kamara. Kasama na ngayon ang ₱130,000 para sa gamutan ng heart attack na hindi kailangang operahan, hanggang ₱530,000 para sa mga procedure tulad ng angioplasty, pati na ang cardiac rehabilitation at ambulance transport.
Binanggit ni Romualdez na ang mga repormang ito ay resulta ng mahigpit na koordinasyon sa pagitan ng House of Representatives, PhilHealth, at Department of Health (DOH). Aniya, ito ang bunga ng pamahalaang nakikinig at kumikilos batay sa tunay na pangangailangan ng taumbayan.
Muling nanawagan si Romualdez para sa karagdagang reporma, kabilang ang rebisyon sa charter ng PhilHealth upang mas maging tunay na katuwang sa kalusugan. Layunin niya na masaklaw ang hindi bababa sa 50% ng gastusin sa mga pribadong ospital at mabigyan ng mga preventive services gaya ng libreng X-ray, mammogram, HPV vaccines, at laboratory tests.
Nagpasalamat din si Speaker Romualdez kay Pangulong Ferdinand R. Marcos Jr., sa pamunuan ng PhilHealth, at sa buong sektor ng kalusugan sa kanilang pagtutulungan para matupad ang pangakong universal health care.
