Nagpahayag ng matibay na suporta ang iba’t ibang partidong politikal sa desisyon ng House of Representatives na pagtibayin ang rekomendasyon ng House Committee on Justice na ibasura ang mga impeachment complaint laban kay Pangulong Ferdinand R. Marcos Jr. dahil sa kakulangan ng sapat na batayang factual.
Sa manifestation sa plenaryo, sinabi ni Butuan City Rep. Jose “Joboy” Aquino II, secretary general ng Lakas–CMD, na bagama’t pumasa sa pormal na rekisitos ang mga reklamo, hayagang kulang ang mga ito sa substansya at nakabatay lamang sa hearsay, hindi beripikadong dokumento, at mga haka-haka.
Binigyang-diin ni Aquino na mahalagang pangalagaan ang integridad ng impeachment process at huwag itong gawing kasangkapan ng pampulitikang panggugulo, giit na nanaig ang Rule of Law sa desisyon ng Kamara.
Sinabi naman ni Negros Occidental Rep. Javi Benitez ng Partido Federal ng Pilipinas na ang pagbasura sa mga reklamo ay nagpapatibay sa katatagan at pagpapatuloy ng pamahalaan, at hinikayat ang Kongreso na muling ituon ang pansin sa mga panukalang batas na direktang makikinabang ang mamamayan.
Nagpahayag din ng buong suporta ang Nationalist People’s Coalition, ayon kay Quezon Rep. Mark Enverga, na iginiit na ang impeachment ay dapat nakabatay sa ebidensya at disiplina ng batas, hindi sa pagkakaiba ng pananaw sa polisiya.
Para sa National Unity Party, sinabi ni Manila Rep. Rolando Valeriano na tama ang naging paghatol ng Justice Committee at malinaw na hindi sapat ang substansya ng mga reklamo upang umusad sa mas mabigat na proseso ng impeachment.
Samantala, sinabi ni FPJ Panday Bayanihan Rep. Brian Poe ng Party-List Coalition Foundation Inc. na sinusuportahan ng kanilang koalisyon ang committee report bilang hakbang tungo sa pagkakaisa at pagbangon ng ekonomiya, iginiit na ang political stability ay mahalaga sa kumpiyansa ng mga mamumuhunan at pandaigdigang merkado.
Binigyang-diin ni Poe na ang suporta sa desisyon ng Kamara ay hindi pagtalikod sa pananagutan, kundi pagpapakita ng tiwala sa mga institusyong may mandato na ipatupad ang batas.
