Inaasahan ni Defense Secretary Gilbert “Gibo” Teodoro na magiging mapayapa ang “Trillion Peso March” na gaganapin sa Linggo, Nobyembre 30, sa Maynila at Quezon City.
Sinabi ni Teodoro na naniniwala siyang magiging maayos ang pagtitipon ng iba’t-ibang grupo sa kabila ng mga posibleng banta.
Iginiit ni Teodoro na laging nakahanda ang pamahalaan sa anumang “worst case scenario” kaya’t may mga nakaabang na ambulansya at emergency services bilang bahagi ng contingency plan.
Ayon sa Philippine National Police, mahigit 15,000 pulis ang ide-deploy upang masiguro ang kaayusan at kaligtasan ng publiko.
Inaasahan ng Metropolitan Manila Development Authority na aabot sa 50,000 katao ang lalahok, dahilan upang magpatupad ng rerouting sa mga pangunahing kalsada.
Ang “Trillion Peso March” ay ikalawang malaking kilos-protesta laban sa umano’y trillion-peso anomalies sa flood control projects ng pamahalaan.
Sa kabila ng mga babala, tiniyak ni Teodoro na igagalang ang karapatan sa mapayapang pagtitipon ngunit binalaan ang mga grupong magtutulak ng kaguluhan na maaari silang arestuhin.
