CENTRAL MINDANAO- Tiniyak ni Kabacan Cotabato Mayor Herlo Guzman Jr sa mga kabakeño ang maraming ipapatupad na proyekto ngayong taong 2020.
Sa panayam ng alkalde siniguro nito ang mga proyektong ipapatupad sa pagpasok ng bagong taon.
Aniya, magpapatuloy ang mga proyektong imprastraktura sa mga barangay ng bayan katulad na lamang ng mga multi-purpose building, road rehabilitation at concreting, at ang mga drainage rehabilitation at desilting.
Dagdag pa rito ang proyektong lahat ng daan sa Barangay Poblacion ay ipapasemento at isasaayos na ayon kay Mayor Guzman, ito umano ay upang mas maipakita sa mga investors ang ganda ng Poblacion bilang sentro ng komersyo ng bayan.
Hindi naman ipinagwawalang bahala ng alkalde ang usapin ng peace and order sa bayan.
Aniya, sa pagtatapos ng 2019, mapalad ang gobyerno lalo pa’t katuwang na nito ang ilang mga grupong dating kumakalaban sa pamahalaan.
Siniguro din nito na mas paiigtingin pa ng LGU katuwang ang mga kapulisan, kasundaluhan, at mga force multipliers ang pagbabantay sa bayan.
Kasabay nito, hinimok ng alkalde ang publiko na magtulong-tulong sa pagbabantay ng kapayapaan sa bayan.
Sa usapin ng kalusugan, nagpapasalamat parin ang alkalde na hindi nahuhuli ang bayan sa pagbibigay ng serbisyo sa usapin ng health services.
Aniya, bagamat may mga pangyayaring hindi inaasahan katulad na lamang ng pagtaas ng bilang dengue cases sa bayan ay walang naitalang casualty at agarang inaksyunan ito ng health providers ng bayan katuwang ang mga Barangay Health Workers. Siniguro din nito na mas pag-iibayuhin pa ng Rural Health Unit ang serbisyo sa publiko at mas gagawing state-of-the-art ang pasilidad ng RHU at mga barangay health stations.
Samantala, hinimok din ng alkalde ang mga residente ng Brgy. Pisan at Brgy. Cuyapon na magtulungan lalo pa’t maraming proyektong parating upang mas mapaayos ang turismo sa bayan. Katulad nga rito ang daan sa Brgy. Pisan na ayon sa alkalde ay hanggang sa highway na.
Sa huli, lubos ang pasasalamat ng alkalde sa suporta, tiwala, at tulong sa programa nitong Unlad Kabacan.
