Hawak na ni 8-division world champion Manny Pacquiao ang ika-siyam na spot sa welterweight ranking, batay sa huling analysis ng The Ring, dalawang linggo matapos ang kaniyang laban kay Mario Barrios.
Agad bumalik ang pangalan ni Pacquiao sa ranking, sa kabila ng apat na taong pamamahinga kasunod ng kaniyang retirement.
Sinusundan ng Pinoy legend ang kaniyang nakalaban na si Barrios bilang No. 8.
Ang The Ring ang tinaguriang ‘bible of boxing’ na regular na naglalabas ng updated ranking para sa mga boksingero sa buong mundo.
Samantala, nangunguna naman sa naturang listahan ang undefeated welterweight fighter na si Brian Norman na sinusundan ng bagitong si Eimantas Stanionis. Pumangatlo sa naturang listahan si Giovanni Santillan.
Ayon sa The Ring, ang bagong ranking ay resulta ng panel discussion, at analysis sa tulong ng Ratings Panel ng mga boxing journalist sa buong mundo.
Ang naturang panel ay binubuo ng mga historian, at boxing journalist na ikinokonsidera bilang eksperto sa kani-kanilang larangan.
Ilan sa mga ikinonsiderang salik ay ang resulta ng kanilang laban, performance ng bawat isa, at kani-kanilang mga track record.
