NAGA CITY-Kumpiskado ang nasa 130,000 Pesos na halaga ng ilegal na droga sa dalawang drug personality sa ikinasang buy-bust operation sa Purok Green Hills, Phase 3, Brgy Market View, Lucena City.
Kinilala ang mga suspek na sina alyas Angelique, 33 anyos, at isang 17 anyos na binatilyo, pawang residente ng nabanggit na siyudad.
Sa nakuhang impormasyon ng Bombo Radyo Naga sa Quezon Police Provincial Office, napag-alaman na naaktuhan ng mga awtoridad ang mga suspek na nagbebenta ng ilegal na droga pagkatapos na makabili dito ang poseur buyer ng isang piraso ng heat-sealed transparent plastic sachet ng pinaghihinalaang shabu.
Maliban sa buy-bust item nakuha rin sa mga suspek ang tatlong plastic sachet ng pinaghihinalaang shabu at ang buy-bust money.
Sa kabuuan, kinakalkulang may bigat na 6.4 grams ang nakumpiskang ilegal na droga at nagkakahalaga ng 130,560 Pesos.
Sa ngayon nasa kustodiya ng mga awtoridad ang mga suspek para sa karampatang disposisyon.
