Plano ng Maharlika Investment Corporation (MIC) na magtayo ng mas pinalawak na oil storage facility sa Pilipinas sa tulong ng gobyerno at pribadong sektor upang makatulong protektahan ang bansa mula sa biglaang pagtaas ng presyo ng langis.
Ayon kay MIC President at CEO Rafael Consing Jr., isasagawa ang proyekto sa ilalim ng consortium model kung saan ang Philippine National Oil Company (PNOC) ang mag-aambag ng lupa o iba pang assets, habang ang MIC at mga pribadong mamumuhunan ang sasagot sa gastusin at operasyon ng mga tank farm.
Sinabi ni Consing na layunin nitong palakasin ang kapasidad ng bansa sa pag-iimbak ng langis nang hindi direktang nagdadala ng malaking risk ang gobyerno sa aktuwal na imbentaryo ng fuel. Tinatayang maaaring matapos at maging operational ang proyekto sa loob ng dalawa hanggang tatlong taon matapos masimulan.
Aminado rin siya na ang kasalukuyang sitwasyon ay nagdulot ng pagtaas ng presyo ng imported fuel ng humigit-kumulang 60% hanggang 70%, na nagreresulta sa mas mataas na kapital na kailangang ilabas ng mga retailer upang mapanatili ang kanilang imbentaryo.
Ayon sa MIC, ang hakbang ay tugon sa kasalukuyang krisis sa presyo ng langis na pinalala ng tensyon sa Gitnang Silangan, kabilang ang limitasyon sa mahalagang shipping routes gaya ng Strait of Hormuz.
Dahil dito, umabot na sa mahigit P100 kada litro ang presyo ng ilang produktong petrolyo sa nakalipas na mga linggo, na nakaapekto sa iba’t ibang sektor, lalo na sa transportasyon.
