Matagumpay na naaresto ang isang mag live in partner sa ikinasang buybust operation sa bayan ng Pozorrubio, Pangasinan.
Ayon kay PMAJ. Zynon Paiking, Chief of Police ng Pozorrubio PS, ang mga naaresto ay sina Jaime Judiel Palaruan, 27 anyos, nakalista bilang street level individual at Bernadette Barlolong, 21 anyos, nakalista naman bilang newly identified drug personality, pawang mga residente ng barangay Panaga, bayan ng Laoac.
Ang kanilang impormante ay nag order ng marijuana at ideneliber naman sa barangay Talogtog, sa nasabing bayan at doon na nahuli ang mga ito nang nagkaabutan ng pakete ng marijuana at buy bust money.
Nabatid na may mga parokyano na sila sa nabanggit na bayan at may mga sinusuplayan din sila sa mga kalapit bayan ng Manaoag at Laoac. Napag alaman na may dalawa rin silang parokyano ang nahuli rin sa barangay Imbalbalatong Pozorrubio kahapon lamang matapos silang maaresto.
Lumalabas sa kanilang imbestigasyon na matagal nang gawain ng lalaki ang illegal na aktibidad at bago pa lamang sa nasabing gawain ang kanyang live in partner nang sila ay magsama na.
Nakuha sa lalaki ang 3 pakete ng marijuana at isang nakarolyo na marijuana, habang buy bust money naman ang sa babae. Nakuha din sa kanilang posisyon ang isang motorsiklo na ginagamit sa kanilang operasyon.
Sa ngayon ay nasampahan na sila ng kaukulang kaso.
Sa buong buwan ng Oktubre, nakapagtala na ang kapulisan ng Pozorrubio ng apat na buy bust operation.
