KALIBO, Aklan — Kahit bukas ang lokal na pamahalaan ng Malay sa posibilidad na pagpapatayo ng kontrobersiyal na Boracay-Malay bridge, marami pa umano itong pagdadaanan bago mabigyang katuparan ang proyekto.
Ayon kay Malay Sangguniang Bayan member Alan Palma Sr., nasa step 1 pa lamang ang San Miguel Holding Corporation matapos ang isinagawang presentation ng proyekto sa konseho noong nakaraang buwan ng Agosto.
Aniya, hanggang sa kasalukuyan ay wala pang abiso ang kompaniya kung hihingi ng endorsement mula sa kanila.
Maliban dito, kailangang makompleto ang mga requirements bago simulan ang proyekto kabilang na ang pagsasagawa ng public consultation upang makuha ang pulso ng publiko.
Nauna dito, sinabi ni Mayor Floribar Bautista na malaking tulong ang tulay upang madagdagan pa ang bilang ng tourist arrival at magkaroon ng easy access ang mga senior citizen at emergency responders sa pagtawid papunta at palabas ng isla.
Dagdag pa ni Palma na sisiguraduhin nilang walang sektor ang mawawalan ng kabuhayan.
Nabatid na tutol sa nasabing proyekto ang Simbahang Katoliko, ilang pribadong sektor, Sangguniang Bayan ng Malay, at Sangguniang Panlalawigan ng Aklan gayundin ang maraming mga residente ng Boracay sa pangambang makakasira ito sa kalikasan at pagkawala ng trabaho ng mga motorbangka operators.
