Binigyang-diin ni Sen. Imee Marcos na wala nang lusot ang Department of Information and Communications Technology (DICT) para hindi buuin ang rehistrasyon ng libo-libong mga guro na bibigyan ng personal digital signatures para patunayan ang bilang ng mga boto sa Mayo 2022.
“Nakahanap na tayo ng solusyon. Kering-keri na natin ito!” ikinatuwang sabihin ni Marcos.
Paliwanag ni Marcos, chairman ng Senate committee on electoral reforms and people’s participation, naaantala lamang ang rehistrasyon para sa mga digital signatures dahil sa mga DICT hard-copy requirements sa mga guro, gayong ipinanukala na ng Department of Education (DepEd) ang bultuhang pagpoproseso ng verified personal data ng mga guro sa pamamagitan ng pagsusumite sa online ng Excel o CSR (Corel binary script ) files.
Limang taon nang naaantala ang pag-rehistro sa mga guro para makakuha ng personal digital signatures na ipinangakong gagamitin sa 2016 at 2019 elections na di naman natupad.
Ani Marcos, ang personal digital signatures ang papawi ng takot na imamanipula ng Smartmatic ang resulta ng eleksyon sa susunod na taon.
“May kusang-loob ba ang mga makina? Mas may tiwala ako sa mga guro kaysa mga Smartmatic machines,” diin ni Marcos.
“Ang solusyon ay makisakay na lang ang DICT sa DepEd sa nakasanayan nang pagpaparehistro at pagmomonitor sa kanilang 900,000 empleyado, “rekomendasyon ni Marcos.
Sa pamamagitan nito, matatapos ang rehistrasyon para sa mga personal digital signature sa Hulyo, na tatlong buwang mas maaga sa iskedyul ng DICT na mula Setyembre hanggang Enero, dagdag pa ni Marcos.
Tanging ang mga machine digital signature ang nagamit mula noong naging automated o computerized ang mga eleksyon noong 2010, bagamat isinasaad ng Omnibus Election Code na kailangang pirmado rin ng mga gurong nagsisilbing board of election inspectors ang mga election returns.
