Kinumpirma ng hostile witness na si dating Office of the Vice President (OVP) Special Disbursing Officer (SDO) Gina Acosta sa kaniyang opisyal na testimonya na si VP Sara Duterte ang nag-utos sa kaniya na ibigay ang ₱125 milyong confidential funds kay Col. Raymund Dante Lachica.
Ginawa ni Acosta ang rebelasyong ito sa harap ng Senate Impeachment Court sa ika-16 na araw ng impeachment trial ni VP Sara.
Sinabi ni Acosta sa kaniyang testimonya na matapos niyang ma-encash o maipalit ang tseke ng confidential funds, tinawagan niya agad si Col. Lachica.
Nang tanungin kung bakit niya ito ginawa, ang kaniyang mismong pahayag ay: “Ang nag-utos po sa akin na i-release ang pera na ₱125M sa security officer na si Colonel Lachica ay si Ma’am Sara Duterte.”
Si Col. Lachica ang pinuno noon ng Vice Presidential Security and Protection Group (VPSPG).
Inilahad din ni Acosta ang dalawang dahilan kung bakit niya ibinigay ang confidential funds kay Col. Lachica. Una ay dahil iniutos ito ni VP Sara bilang Head of Agency at pangalawa, si Lachica ang eksperto na nagpapatupad ng mga confidential operations ng OVP.
Tinanong naman ni Trial Presiding Officer Francis “Chiz” Escudero kung trabaho ng security officer na gastusin ang dinisburse na confidential fund ni Acosta bilang special disbursing officer.
Sumagot naman ng “hindi” si Acosta dahil trabaho ito ng SDO subalit kapag nai-release na aniya ang pera tungkulin ng security officer na magsumite ng utilization report bilang patunay na naipatupad ang confidential activities.
Samantala, inatasan ni Trial Presiding Officer Francis “Chiz Escudero si Acosta na bumalik bukas, Agosto 18 para muling tumestigo sa ilalim ng parehong subpoena.
