Naglaan ang Department of Budget and Management (DBM) ng kabuuang P16.9 bilyon para sa pagtaas ng suweldo ng mga manggagawa sa gobyerno sa panukalang 2024 National Expenditure Program (NEP).
Sinabi ng DBM na ang iminungkahing pagtaas ng suweldo ay magiging increments o isang hakbang sa isang pagkakataon sa ilalim ng mga probisyon ng Miscellaneous Personnel Benefits Fund (MPBF).
Ayon kay DBM Secretary Amenah Pangandaman, naglaan ang pamahalaan ng P16.95 Billion sa Fiscal Year 2024 Miscellaneous Personnel Benefits Fund para suportahan ang compensation adjustment na maaaring ituloy simula sa susunod na taon.
Ayon kay Pangandaman, ang halaga ay tinantya batay sa posibleng pagtaas mula 2 hanggang 8 porsiyento sa buwanang suweldo ng iba’t ibang posisyon sa pambansang pamahalaan.
Tinukoy din niya ang huling tranche ng salary hikes na ipinag-uutos ng Salary Standardization Law of 2019 na ipinatupad noong Enero.
Una nang sinabi ni Pangulong Ferdinand “Bongbong” Marcos Jr. sa DBM na sa pagpapatupad ng pagtaas ng suweldo, dapat itong masusing pag-aralan.
