MANILA – Tinatapos na ng Food and Drug Administration (FDA) ang panibagong guidelines sa pagtuturok ng COVID-19 vaccines na gawa ng kompanyang AstraZeneca.
Ito’y kasunod ng suspensyon sa pagbabakuna nito sa mga edad 59-anyos pababa dahil sa mga kaso ng blood clotting at mababang platelet count sa ibang bansa.
“Tinatapos na natin ngayon para mailabas this week,” ani FDA director general Eric Domingo.
Ayon sa opisyal, nagbigay na ng output ang World Health Organization at National Adverse Events Following Immunization Committee (NAEFIC), kung saan binigyang diin nila na matimbang pa rin ang benepisyo ng bakuna kumpara sa posibleng banta nito.
Una nang sinabi ng European Medicines Agency na itinuturing na “very rare adverse effect” ang nabanggit na mga kaso, at nilinaw na ligtas pa rin gamitin ang AstraZeneca vaccines.
“Sinasabi naman ng lahat na benefit still outweighs the risk.”
Ibababa raw ito sa hanay ng mga mga vaccinators para wastong maipaliwanag sa publiko ang mga indikasyon sa pagtanggap ng AstraZeneca vaccine.
“Maglalabas tayo ng guidelines lalo na sa mga magbabakuna para ma-advice yung babakunahan kung anong symptoms to watch out for at para alam ng mga pasyente kung may nararamdaman sila kung kailan sila magpapa-konsulta for this very rare adverse effect of blood clotting.”
