Nagbigay ng pansamantalang tirahan ang Department of Social Welfare and Development (DSWD) sa 227 street dwellers mula sa Maynila, Pasay at Caloocan.
Una nang inanunsyo ng DSWD na inilunsad nito ang kanilang reach-out operation na tinawag na “Oplan Pag-abot” noong Hulyo 3.
Nakatulong ito sa 38 pamilya o 113 indibidwal, 111 unattached adults, at tatlong walang kasamang batang lansangan.
Ang families and individuals in street situations (FISS) sa tatlong lungsod ay binigyan din ng angkop na mga tulong.
Sinabi ni DSWD spokesperson Assistant Secretary Romel Lopez na sasailalim ito sa evaluation at biometric registration para sa pag-iisyu ng kanilang mga identification card.
Ang pagproseso ng impormasyon ng mga benepisyaryo ay tutukuyin ang mga naaangkop na intervention na kanilang kinakailangan.
Sinabi ng DSWD na ang “Oplan Pag-abot” ay isang malaking proyekto na naglalayong tulungan ang mga taong naninirahan at nananatili sa mga lansangan sa pamamagitan ng pagbibigay sa kanila ng mga kinakailangang interbensyon na kinabibilangan ng pansamantalang tirahan o proteksyon na kustodiya.
Ipinakita ng lokal na pamahalaan ng mga lungsod ang kanilang suporta sa proyekto sa pamamagitan ng pagsali sa mga social worker ng DSWD sa mga programang reach-out nito.
Tumulong din sa aktibidad ang ilang miyembro ng Metropolitan Manila Development Authority (MMDA), Commission on Human Rights (CHR), at Philippine Statistics Authority (PSA).
