Nagpaalala ang Department of Labor and Employment (DOLE) sa mga employer na tiyaking tama ang pasuweldo sa mga manggagawang naka-duty ngayong Bonifacio Day.
Sa Labor Advisory No. 13, hinimok ng DOLE ang mga kumpanya na sumunod sa itinakdang patakaran upang mapanatili ang makatarungang labor practices at maprotektahan ang karapatan ng mga manggagawa sa pagdiriwang ng regular holiday.
Ayon sa guideline, kung hindi papasok ang isang empleyado ngayong holiday, dapat pa rin siyang bayaran ng 100 percent ng kanyang arawang sahod, basta’t pumasok siya o naka-leave with pay noong araw na nauna sa holiday.
Para naman sa mga magtatrabaho ngayong Bonifacio Day, nakasaad na dapat bayaran sila ng kabuuang 200 percent ng kanilang sahod para sa unang walong oras ng trabaho. May karagdagang 30 pecent pa ang dapat ibigay kung lalampas sa walong oras ang kanilang duty.
