MANILA – Binigyang diin ng Department of Health (DOH) na hindi nagkulang ang ahensya sa pagtugon sa aplikasyon noon ng Chinese pharmaceutical company na Sinopharm para sa clinical trials.
Pahayag ito ng kagawaran sa gitna ng pinalutang na akusasyon ng umano’y local distributor ng Sinopharm COVID-19 vaccines.
“We were able to process this and we did not received any response to them,” ani Health Usec. Maria Rosario Vergeire.
“There’s no truth in this allegation na inupuan natin ito (application).”
Kamakailan nang sabihin ng ilang nagpakilalang representatives ng MKG Marketing Corporation na hindi raw pinansin ng DOH ang aplikasyon ng Sinopharm noong May 2020.
Pero ayon sa Department of Science and Technology (DOST), wala na silang narinig na tugon mula sa kompanya nang sabihin nila na tanging clinical trials ng World Health Organization ang gagastusan ng gobyerno.
“The last time nag-response sila, nagkaroon ng verbally, sinabi nila sa DOST na they are not interested in conducting their clinical trial here,” ani Vergeire.
Ayon sa tagapagsalita ng DOH, sinubukan nilang makipag-ugnayan noon sa Chinese Embassy sa pamamagitan ng Sinopharm, dahil dalawang kompanya ang nag-aagawan para maging local distributor ng kanilang bakuna.
“May mga documents kami to show these are evidences that these were processed properly, we were able to communicate and coordinate with them, unfortunately no response were provided to us after those communications.”
APPLICATION PROCESS
Pinaalala ni Usec. Vergeire ang pagkakaiba ng prosesong dinadaanan kapag ang aplikasyon ng vaccine manufacturer ay para sa clinical trial o kaya naman ay procurement.
“Kapag its for clinical trial, it goes to the office of the DOST. They are the head in our screening and evaluation.”
Matapos maaprubahan ng DOST-Vaccine Expert Panel, kailangan din makakuha ng aplikante ng approval mula sa Single Joint Review Ethics Board at Food and Drug Administration (FDA).
“Kapag procurement, ito yung pumapasok na yung FDA ang maggagawa ng evaluation, through their scientific advisory.”
Hindi natatapos sa FDA approval ang aplikasyon para sa procurement. Ayon kay Usec. Vergeire, kailangan pumasa sa evaluation ng Health Technology Assessment Council (HTAC) ang mga bibilhin na bagong health products ng gobyerno.
Ilan daw sa pinag-aaralan ng HTAC ay ang cost effectiveness at risk-benefit analysis.
“Which ranges from the efficiency of government to ethics, yung mga political and other acceptability measures.”
Tiniyak ng DOH na lahat ng aplikasyon ipinapadala sa kanila ay dumadaaan sa tamang proseso, sa kabila ng puspusan na paghahanap ng lunas sa COVID-19.
Nitong Lunes sinabi ni Philippine Ambassador to China Chito Sto. Romana, na ngayong linggo inaasahang magpapasa ng aplikasyon para sa emergency use authorization ng kanilang bakuna sa bansa ang Chinese companies na Sinovac at Sinopharm.
